و نكمل ( هذه التدوينة عن ايش هي احتياجات بشرتك للعناية بها )



















لا تهتمو بالصورة واللي فيها التصوير كان ع السريع و خميت كل شي قدامي 😀👣👣



البشرة الحساسة 

اكثر البشرات اللي اخاف اعطي لها معلومات او كيفية العناية بها بسبب هذه البشرة جدا حساسة 
انتي تحتاجي تقشير مره في الاسبوع و الافضل شي طبيعي 

التقشير : سكر و زيت زيتون ... 

الغسول الافضل غسول سيتافيل للبشرة الحساسة راح انزل عنه قريب 

المرطب : كيوفي او سيتافيل 


البشرة الدهنية 

اه اه اه هذه البشرة تحتاج عناية كاملة و منتجات كثيرة 

اول شي التقشير : الافضل اويل فري مثلا زي اللي في الصورة من كلين اند كلير عندي الازرق و الاورنج اللي بفيتامين سي و كمان مقشر نيتروجينا بالقريب فروت حلو و هو اويل فري 
و البشرة هذه عادي تستخدمي لها كريم كاب للتقشير 

ثاني شي : الغسول و الافضل زي ما قلت اويل فري او قوامه جل في الصورة انا استخدم بيودرما راح اعمل لكم ريفيو عنه قريب و كمان سيتافيل للبشرة الدهنية 

ثالث شي : تحتاجي طين ! نعم طين سواء كان طين مغربي او اوروبي او حتى قناع الطحالب اللي في الصورة 

سبب استخدامك للطين هو عشان يخفف من الدهون و اللمعه و كمان يقفل و يصغر المسام و ايضا يخفف من ظهور الرؤوس السوداء .... الطين يستخدم مره في الاسبوع و راح اعمل لكم ريفيو عن الانواع اللي عندي 

رابع شي : التونر , ايش فايدته هو يقفل المسام و مكان الرؤوس السوداء و تقدري تستخدمي بداله ماء الورد البارد

تحتاجي : مرهم للحبوب و حب الشباب للازمات وهذا النوع من البشرات تكثر ظهور الحبوب بسبب الدهون انا استخدم جل ديفيرين كمان راح اعمل لكم ريفيو عنه

لصقات للرؤوس السوداء


البشرة المختلطة : 

استخدامها بحسب ميول بشرتك لي اي نوع سواء للدهنية او الجافة 
بس الطين يوضع فقط في الاماكن الدهنية عشان لا يسبب زيادة جفاف للمناطق الجافة 

و ايضا كريمات البشرة الجافة توضع فقط في الاماكن الجافة او ريحي نفسك و استخدمي كريم بيبانثين الازرق 


البشرة الجافة : 

اهم شي الترطيب ثم الترطيب  و افضل شي كريم كيوفي او سيتافيل او بيودرما لون العلبة ابيض و ازرق 

التقشير : مهم عشان تزيلي القشور بس انتبهي ما يكون مكتوب عليه اويل فري , شفت بلوقر قالت بشرتها حساسة و تستخدم مقشر من نيفيا لونه ازرق فاتح و نيتروجينا لونه العلبة اورنج و شفاف و لون المقشر اخضر 

الغسول : افضل شي سيتافيل 


البشرة العادية 
كمان تختاري ميولها للبشرة بس انتبهي من منتجات البشرة الدهنية عشان لا تقلب لك بشرتك للدهنية 

و كمان اذا اخترتي منتجات البشرة الجافة يمكن تقلب بشرتك للجافة 😓

ادري حيرتكم بس انتي لهذه البشرة دايما التوازن حلو 


اظن خلصت من موضوع انواع البشرة وهي اربعة اجزاء راح يكون لها تاق خاص اسمه  (انواع البشرات  )عشان تكون سهل الوصول 


اممم اذا عندكم سؤال اكتبوه في الكومنت هنا اكيد الكل مسجل في قوقول و gmail يعني تقدرو تكتبو كومنت هنا 

بسبب انه في كثير يقرؤ هنا و يراسلوني في الانستقرام دايركت و بصراحه اصلا هو مليان بالاسئلة اللي توصلني و يمكن ما اقدر اجاوبك بسرعة 
فالافصل هنا 


اتمنى اكون افدتكم 

وسلامتكم ❤