السلام عليكم 



مع بداية الشتاء و البشرة في هذا الفصل تصير جافة او تحتاج ترطيب عميق حبيت اكتب عن منتجات خاص للبشرة الجافة و الحساسة اللي هي منتجات من شركة كيوفي QV
منتجات كيوفي تمتاز انها طبية و خالية من العطور الكحول و تناسب اكثر شي البشرات الجافة و الحساسة و العادية هذه تجربتي لمنتجات هذه الشركة 
مرطب كيوفي من الكريمات المعروفة للترطيب , ترطيبها عالي جدا و البنات اللي يعانو من الاكزيما كمان راح يناسبهم في منه احجام مختلفة هذا الحجم مناسب للوجه و اذا تبغي تستخدميه للجسم 
اشتري الحجم الكبير 
طبعا انا بشرتي مختلطة بس في الشتاء تصير مايلة للجافة اكثر شي 
غسول كيوفي للوجه كمان من الغسولات اللطيفة ينظف البشرة هو مو غسولي المعتاد لكن استخدمه بعد حف الوجه لانه في بعد الحف البشرة تكون متهيجة و محمره ف احتاج غسول لطيف و طبي ما يزيد التهيج 
لوشن كيوفي ترطيبه اخف من الكريم السابق ارشحه للبشرات الدهنية و المختلطة البشرة تمتصه بسرعة وفي نفس الوقت ترطيبه جيد تقريبا نفس ترطيب كريم بيبانثين الازرق 
صابون كيوفي الصلب خالية من العطور فيه نسبه من الحموضة عشان يتوازن مع حموضة الجسم و ما يسبب جفاف بس بصراحة ما استخدمتها كثير هي تناسب الوجه و الجسم و للكبار و الصغار 
كريم كيوفي النهاري من المفضلين عندي و دايما ارجع اشتريه , انا من النوع اللي ما اطلع في النهار كثير طبعا عاطله ههع , ف استخدمه مرات اذا بروح المول او السوق عامتا و مرات اذا بروح ل بنده او اي سوبرماركت كبير عشان اتفادى الزحمة احب اروح الساعة 10 او 9 صباحا , المهم فيه حماية من الشمس بنسبه 30 , يعني كويس و يحمي من الاسمرار الناتج عن اشعه الشمس مناسب للبنات او حتى الشباب نفس وضعي ما يتعرضو للشمس كثير يعني من السيارة للمول او السوبرماركت او اي كان مشوارك
كريم كيوفي الليلي ترا كنت استخدمه الشتاء الماضي و لحد اليوم ما رميت علبته هع , اليوم حصلته و قلت مره وحده اصوره و اكتب عنه و بعدين ارميه , هو كريم يناسب البشرات الجافة فقط يرمم الجلد و يخليه ناعم و خالي من التشققات طبعا مفعوله يبدأ في الظلام لانه كريم ليلي استخدميه قبل النوم اغسلي بشرتك و حطي منه و في الصبح اغسليه 
كريم اليدين من كيوفي ترطيبه حلو بس مو عالي يعني ترطيب عالي للبنات اللي يبغو مرطب غير معطر , طبعا ما يسمر و يعطي نعومه 
بلسم القدمين من كيوفي هذا اشتريه لما الاحظ انه رجولي الله يكرمكم جافة او فيها تشققات 
فايدته يرمم الجلد و يشيل التشققات و ينعم الارجل حطي منه و البسي شراب مع الايام راح تلاحظي نعومه , المهم انا راح اكتب موضوع لحاله عن العناية بالقدمين 

كل هالمنتجات متوفره في الصيدليات زي النهدي و بوتس و وايتس و غيره من الصيدليات 

الاسعار تبدأ من 35 ريال لحد 100 ريال 



وهذا كان موضوع اليوم بعد غياب عن المدونة 


و سلامتكم